హైదరాబాద్ మార్కెట్లోకి రాయల్ ఎన్‌ఫీల్డ్ 'ఫ్లయింగ్ ఫ్లీ' ఎలక్ట్రిక్ బైక్

ప్రముఖ ద్విచక్ర వాహన తయారీ సంస్థ రాయల్ ఎన్‌ఫీల్డ్, ఎలక్ట్రిక్ వాహన రంగంలోకి వ్యూహాత్మక అడుగులు వేస్తోంది. తన ప్రత్యేక ఎలక్ట్రిక్ మొబిలిటీ బ్రాండ్ 'ఫ్లయింగ్ ఫ్లీ' నుంచి అత్యాధునిక 'C6' మోడల్ ఎలక్ట్రిక్ మోటార్‌సైకిల్‌ను హైదరాబాద్ మార్కెట్లో అధికారికంగా విడుదల చేసింది. బెంగళూరు తర్వాత ఈ బైక్ అందుబాటులోకి వచ్చిన రెండో భారతీయ నగరంగా హైదరాబాద్ నిలిచింది. 2026 అక్టోబర్ 9 నుంచి నగరంలో దీని అమ్మకాలు, సర్వీస్ కార్యకలాపాలు అందుబాటులో ఉంటాయి.

నగరంలోని వినియోగదారులకు మెరుగైన, నాణ్యమైన సేవలు అందించేందుకు కంపెనీ 'హబ్-అండ్-స్పోక్' మోడల్‌ను అనుసరిస్తోంది. ఇందులో భాగంగా ఎర్రగడ్డ మెయిన్ రోడ్‌లో కంపెనీ తన సొంత ఫ్లాగ్‌షిప్ స్టోర్‌ను ఏర్పాటు చేసింది. ఇక్కడ ప్రత్యేకమైన సాంకేతిక సేవలు అందుబాటులో ఉంటాయి. వీటితో పాటు వనస్థలిపురంలోని టారస్ మోటార్స్, హైటెక్ సిటీలోని బోల్ట్ మోటార్‌సైకిల్స్ ఎల్‌ఎల్‌పి, కొండాపూర్‌లోని ఎస్‌విఆర్ మోటార్స్ అనే మూడు భాగస్వామ్య అవుట్‌లెట్ల ద్వారా సాధారణ సర్వీసింగ్, నిర్వహణ సేవలను అందిస్తోంది. అంతేకాకుండా, ప్రతి బైక్‌తో పాటు 24x7 రోడ్‌సైడ్ అసిస్టెన్స్ సౌకర్యాన్ని కూడా కల్పిస్తున్నారు.

హైదరాబాద్‌లో ఈ బైక్ ఎక్స్-షోరూమ్ ధరను రూ. 2.79 లక్షలుగా నిర్ణయించారు. అయితే, వినియోగదారుల వెసులుబాటు కోసం 'బ్యాటరీ-యాజ్-ఎ-సర్వీస్' (BaaS) ఆప్షన్‌ను కూడా అందుబాటులోకి తెచ్చారు. ఈ విధానంలో బ్యాటరీ మినహాయించి కేవలం రూ. 1.99 లక్షలకే బైక్‌ను కొనుగోలు చేసే అవకాశం ఉంది. ఈ మోటార్ సైకిల్ స్టార్మ్ బ్లాక్, ఫ్లీ గ్రీన్, పారాచూట్ వైట్ అనే మూడు ఆకర్షణీయమైన రంగుల్లో లభిస్తుంది.

1940ల నాటి క్లాసిక్ ఫ్లయింగ్ ఫ్లీ మోటార్‌సైకిల్ నుంచి స్ఫూర్తి పొంది, ఆకట్టుకునే నియో-రెట్రో డిజైన్‌తో దీన్ని రూపొందించారు. ఇందులో 3.91 kWh లిథియం-అయాన్ బ్యాటరీ ప్యాక్, 15.4 kW శక్తిని, 60 Nm టార్క్‌ను ఉత్పత్తి చేసే శక్తివంతమైన ఎలక్ట్రిక్ మోటార్‌ను అమర్చారు. ఒక్కసారి ఛార్జ్ చేస్తే 154 కిలోమీటర్ల IDC రేంజ్ ఇస్తుందని కంపెనీ స్పష్టం చేసింది. కేవలం 3.7 సెకన్లలో 0-60 కి.మీ. వేగాన్ని అందుకునే ఈ బైక్, గంటకు 115 కిలోమీటర్ల గరిష్ఠ వేగంతో ప్రయాణిస్తుంది.

గూగుల్ మ్యాప్స్ మిర్రరింగ్ సపోర్ట్ చేసే సర్క్యులర్ టచ్ ఎనేబుల్డ్ TFT కన్సోల్, క్రూయిజ్ కంట్రోల్, ఐదు రైడింగ్ మోడ్స్ (ఎకో, రెయిన్, హైవే, స్పోర్ట్, కస్టమ్), కార్నరింగ్ ఏబీఎస్, ట్రాక్షన్ కంట్రోల్, థెఫ్ట్ అలర్ట్ వంటి అత్యాధునిక ఫీచర్లు ఇందులో ఉన్నాయి. ఇటీవల యూరప్‌, యూకే మార్కెట్లలోనూ ప్రవేశించిన ఈ బైక్‌కు బెంగళూరులో విశేష స్పందన లభించింది. ఈ నేపథ్యంలో దశలవారీగా దేశవ్యాప్తంగా విస్తరించే ప్రణాళికలో భాగంగా ఇప్పుడు హైదరాబాద్‌ మార్కెట్లో ప్రవేశపెట్టారు.